សម្តេចតេជោ ហ៊ុន សែន ជួបពិភាក្សាការងារជាមួយឯកអគ្គរដ្ឋទូតបារាំងថ្មីប្រចាំកម្ពុជា

នៅរសៀលថ្ងៃនេះ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានទទួលជួបសម្តែងការគួរសម និងពិភាក្សាការងារជាមួយឯកឧត្តម ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំកម្ពុជា។

នៅក្នុងជំនួបនោះ ភាគីទាំងពីរបានពិភាក្សាយ៉ាងស៊ីជម្រៅអំពីការបន្តពង្រឹងចំណងមិត្តភាពជាប្រវត្តិសាស្ត្ររវាងកម្ពុជា និងបារាំង ព្រមទាំងការជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម អប់រំ និងវប្បធម៌។

សម្តេចតេជោបានស្វាគមន៍បេសកកម្មការទូតរបស់ឯកឧត្តមអគ្គរដ្ឋទូតថ្មី និងបានសម្តែងក្តីសង្ឃឹមយ៉ាងមុតមាំថា ទំនាក់ទំនងរវាងប្រជាជាតិទាំងពីរនឹងកាន់តែរីកចម្រើនឡើងមួយកម្រិតថែមទៀតក្នុងអាណត្តិការទូតនេះ។